geguritan kaple

Pupuh sinom

1.      Swastiastu atur titiang

Indik galah sane mangkin

Punika wantah cerita

Sane mangkin katuturin

Nanging patut kapirengin

Yadiapin wantah pitutur

Anggen dasar mapisolah

Ane becik katuladin

Patut tiru

Anggen tetuladan jagat.

2.      Weten katuturan satua

Anak lanang tambet gati

I kaple ia wastannya

Solahnya kalintang asih

Nanging jelek ne tepukin

Sawireh belog kaubuh

Ulian dewekne kasian

Mangkin ala ne nyagjagin

Ia katundung

Nanangnya gedeg kaliwat

Pupuh Ginada

1.      Punika wenten carita

Anak cerik ngangon sampi

Wantah punika karyannya

Gaen lenan ten karungu

Tambetne sampun kaliwat

Nanging asih

Bikas utawi solahnya

2.      I kaple meled makarya

Usan mangangonang sampi

Nunas tulung ring bapannya

Mangda kakaryanang  bubu

Di suba bubune pragat

raris mangkin

pasang bubune ring tukad.

3.      Bubune sampun pasanga

Semengan sampun matangi

Laut bubu kaungkabang

buron besik kaden liu

punika wantah i semal

puntag-pantig

I sema l laut ambila.

4.      I semal mangeka daya

Ngelantur mangidih urip

Lantas i semal kalepas

Sawireh ia mangugu

Makecos lantas i semal

Tusing nolih

Ne pasti ia kalebang

5.      Keker,kidang lan gadagan

Buron ne ane tepukin

Nanging samian kalebang

Ulian pedalem manunu

Ngawinang gedeg nanangnya

Sane mangkin

Ipun katundung bapannya.

6.      Ikalpe ngeling sigsigan

Ulian unduk ne tepukin

Kacunduk sareng i semal

Tur mangidih nagih nutug

Makapatpat kasiannya

Diastun mati

Tetep satya kasiannya.

Pupuh ginanti

1.      Kasian satya manutug

Jagi kanagara mangkin

Ring margi wetengnya layah

Paling ngalih dagang nasi

Malih nenten wenten jinah

Ngaduang keker sanggupin

2.      I keker lantas aduang

Matoh aji satus ringgit

Mare acepok gebuga

Ditu lantas musuh mati

I kaple marasa lega

Sisan mati pada jerih

3.      Rauh lantas anak agung

Jagi sareng mangetohin

I keker kasub ririhnya

Masih ya tan kalah tanding

Yening ikaple ne menang

Sinah arta ne kapolih.

4.      Ne mangkin sampun rahayu

Ikaple mabalik mulih

Sambilang mamakta jinah

Ogar-ogar mangaukin

Nanging ten nolih nanangnya

Malengok marasa sedih

5.      Makelesog jinah ipun

Lantas jlanan kaungkabin

Madengok lantas nanangnya

Pati kaplug manyagjagin

I kaple madudug harta

Sane mangkin sampun sugih .

Pupuh maskumambang

1.      Ampurayang

Yening wenten iwang mangkin

Niki wantah tembang

Sane madasar ring hati

Nenten niru

Tembange sane kawentenang.

                                                Suksma

contoh geguritan

PUPUH SINOM

Idupe mondong sengsara

Mangke idup besok mati

Mamanjakin kranjang padang

Peteng lemah ye openin

Tan wangde tua lantas mati

Sane keto pacang tepuk

Puput dane nimbang manah

Tumuli mebalik mulih

Tur kacunduk

Meme bapannyane jumah

PUPUH SEMARANDANA

Singgih ratu sanghyang widhi

Cingak pangebaktin titiang

Titiang damuh iratune

ayat   mengaturang sembah

noratama saranane

masarana antuk santun

ledang ugi ngampurayang

PUPUH GINADA

Katah anak kadroponan

Ajum ngangken ngardi becik

Nanging satak ngingsak ayam

Boncoh nulung pitik puun

Tur madasar manah punyah

Tong maludih

Ne keto tan nyandang tulad

PUPUH GINANTI

Ring sekolah genah ipun

Telebang janten kepanggih

Melajah seken-sekenang

Eda sok demen melali

Laline mearti engsap

Yen engsap metuara kali

PUPUH  PANGKUR

Ngungsi kantor sekolahan

Jug macelep sang kalih ngungkab topi

Nunas lugra ring tuan guru

Tuan guru meanggukan tur ngandika

Uli dije cening bagus

Nyen cening ajak dadua

Angob bapa mangiwasin

PUPUH PUCUNG

Cening bagus

Sampunang ja makta kayun

Alpaka ring biang

Miwah langgyana ring aji

Sayan bendu

Sang sisiane tur ngandika

PUPUH DURMA

Mule sulit memunahang saktin indria

Yan tan tasaking samadi

Sangkan yan buatang

Suluhin ban sastra gama

Susila maka pangabih

Nto  gemetang

Uli cerik kanti lingsir

PUPUH DANDANG GULA

Benjang semeng madabdabin raris

Sang pandawa

Sah saking wirata

Kuru ksetra kaungsi

Pamargin ida puniku

Tan pendah hyang surya mijil

Saking pucaking acala

Nyuluhin pertiwi ibu

Jejel para wira yoda

Sang pandawa

Kadi segara upami

Rauh ring madianing acala

PUPUH MASKUMAMBANG

Sang suputra

Yen rerehang pangupami

Tan pendah cendana

Ring tengahing alas rawit

Miik  ngalub  ngardi suka

PUPUH MIJIL

Singgih ratu sanghyang maha suci

Bakti titiang nyokor

Ring bukpade singgih betarane

Mogi ratu ledang manyuecanin

Kaulane sami

Mogi polih mangguh ayu

PUPUH SINOM

1.      Sekolah genah melajah

Pulpen to anggen manulis

Buku to patut kabaca

De pati demen melali

Keto pak guru ngorahin

Punika wantah pitutur

Tutur ne patut katulad

Samian sisia kaortain

Mangda tinut

Rerama sami bagia

2.      Wenten nenem mahasisia

Samian mapisolah becik

Tan wenten sane alpaka

Malajah patut selegin

Mangda dados jatma luih

Punika wantah pisuluh

Anggen dasar tetuladan

Nenten dados kalempasin

Nika patut

Anggen teuladan jagat

3.      Swadarma ne dados sisia

Malajah patut selegin

Mamaca miwah manyastra

Malajah ngisiang pangutik

Mangda tulisane becik

Korekin tingkih matunu

Mangda prasida mamaca

Sastra bali ne katulis

Ngantos puput

Tulisin edon entalnya

4.      Malajah ngiring malajah

Malajah madue arti

malajah anggen kaweruhan

eda ragane merati

malajah patut selegin

mangda dados jatma patut

sane prasida ngilangang

sastra bali ne ring gumi

tanpa tutur

tetep sastrane ajegang

5.      Para sisya sinamian

Ngiring urati akidik

Plajahin sastra agama

Eda mapineh ten becik

Melajah ngiring tampekin

Parilaksanane santun

Yan   suputra dados jatma

Jatma ne masolah becik

Ngantos nguntul

Ningeh pitutur agama

6.      Purusa miwah pradana

Sastra ne anggen nasarin

Makidung magaguritan

Punika anggen nglestari

Jatma mabudi pekerti

Maparilaksana patut

Ngrereh jatma ne suputra

Mangda eling sareng sami

Nenten rusuh

Nika patut lestariang.